早前潛水器泰坦號下水參觀鐵違尼號殘骸時發生內爆，導致5人死亡。事發後有人出post話，Celine Dion為《鐵違尼號》主唱嘅主題曲My Heart Will Go On，喺泰坦號事故發生後再次登上Billboard音樂榜，不過稍後發布呢個消息嘅平台twitter已經fact check咗話並無此事。
而咁啱得咁蹺，串流平台Netflix將會喺7月1號起，安排電影《鐵違尼號》7月登陸美國同加拿大俾用戶收睇。此舉惹來唔少網民不滿，認為Netflix疑似用泰坦號事故「抽水」，做法過火。
不過根據外媒Deadline引述消息人士指，事件純屬巧合，因為泰坦號喺6月22號傳出失蹤，而《鐵違尼號》要喺Netflix上架，並唔係send個file出去就得，背後要處理好串流相關文件等流程先得，需時要幾個月，相信Netflix並無抽水之意。
Netflix不時都會將舊片上架，例如北美7月片單就有2011年嘅《最爆伴娘團》、2013年嘅《白宮末日》同埋去年底嘅《無敵貓劍俠: 8+1條命》。