TVB有唔少新聞美女主播，其中一位就係財經體育資訊台首席記者伍楚瑩（Bonnie）。伍楚瑩因為長相甜美，更曾被網民封為「港版有村架純」；不過，昨日（28日）伍楚瑩於IG宣布離職，佢分享咗一張依靠於無綫採訪車車頭嘅照片，以及2張工作照，又留言表示：「最後一天出crew了，多謝攝影拍檔永成爸爸！」網民紛紛留言表達不捨：「捨不得你，前程似錦」、「又走一個有實力嘅主播」、「O… 又一個走了」、「“楚”低慢慢諗下前路點。」等等。早於數天前，伍楚瑩曾發文寫道：「其實在地球生存得越耐，奇趣的人和事就像 彈道導彈 般，朝着你而來。即使五感受到衝擊，但幸運的是我的理念也沒有被動搖。」似乎會有新開始。然而，伍楚瑩又上載一張齊劉海新髮型照：「做返自己，鍾意齊陰就齊陰」；呢個新髮型就被網民激讚靚女：「逆齡生長」、「你真係好靚呀」、「呢個髮型最靚」、「同意做返自己」等等。

其實，伍楚瑩係童星出身，曾經於TVB經典劇集《溏心風暴之家好月圓》飾演年輕版于素心（鍾嘉欣），與童星李日昇合作，惟伍楚瑩長大後無選擇演藝路；反而，加入無綫新聞部，從跑港聞開始，到現時負責財經體育資訊台主持和記者，仲曾主持過財經節目《日日有樓睇》；另一身份就係香港天文台前台長林超英新抱，伍楚瑩2019年與林超英次子林丰結婚，林丰曾到英國University of Southampton（南安普敦大學）及University of Sussex（薩塞克斯大學）留學修讀作曲。