第41屆香港電影金像獎頒獎典禮星期日晚舉行，而大會已經率先公布今屆「終身成就獎」得主係入行70年嘅資深演員胡楓（修哥）。

修哥由粵語片時代屹立到而家，遊走電視電影圈，形象正氣敬業樂業之外，最出名都係圈中契仔契女多，包括張學友、黎明、林憶蓮、劉美君、方國珊、陳輝虹、樓南光、張家輝、斑斑、黃造時、徐思斐、朱健鈞及周啟生等。

修哥同呢班「仔女」結緣多數都係因為拍戲。喺1987年修哥拍劇集《女捕快》，就一次過同劇中四個女主角方國珊、斑斑、黃造時、徐思斐上契，係佢第一次收圈中後輩做契女。而家成為區議員嘅方國珊憶述當年跟足儀式，向契爺斟茶之餘仲互送金器。

之後1988年胡楓拍劉鎮偉執導嘅《猛鬼學堂》，戲中修哥飾演警隊高層，帶領一班年輕雜牌軍捉殭屍。修哥因此同同片嘅張學友、樓南光、陳輝虹、劉美君及林憶蓮上契。早前修哥開慶祝90大壽演唱會，張學友有份撐場做嘉賓，而身在外地嘅林憶蓮亦拍片祝賀，可見佢地多年來感情仍然好好。

隔多一年，修哥拍電影《四千金》又收多個契仔，呢位就係黎明。方國珊曾經提到，當年Leon上契前，喺一次聚會有問過佢地4位修哥契女批准，先至正式同修哥上契。

前年喺TVB劇再次現身嘅朱健鈞，1993年被TVB力捧之時獲安排拍處境劇《開心華之里》，得到同劇嘅廖啟智促成之下，修哥又收多一名圈中契仔。拍戲之外，修哥亦因為搞演唱會而收到契仔。音樂人周啟生喺2013年跪地求修哥收佢做契仔，修哥就話觀察咗對方大半年，覺得佢敬業樂業而且對人好，最終肯首，令周啟生成為修哥第14個契仔。

外界一路都知張學友「細佬」張家輝都係修哥契仔，但去年修哥演唱會上學友大爆家輝原來未正式「加盟」，即係同修哥未有做正式上契儀式。

修哥太太呂詠荷2016年逝世，張學友、林憶蓮、劉美君及張家輝都有到靈堂拜祭，最早上契嘅方國珊同斑斑就幫手打點契媽後事同陪伴契爺出入，一眾契仔女都相當有心。