何天兒（前名何傲兒）參選2007年香港小姐入行，拍過《畢打自己人》、《誰家灶頭無煙火》等處境劇，又曾於劇集《波士早晨》豁出去扮醜，飾演李佳芯姐姐哨牙妹阿鳳，不過2015年播出時已離巢TVB，未見有太大迴響。何天兒離巢TVB後逐漸淡出香港娛樂圈，北上轉型做KOL拓展事業。去年，何天兒突然現身李佳芯（Ali）主持嘅myTV SUPER Original原創節目《夢中．情．人》做嘉賓，身材與外貌再被關注，被指輪廓及面型比以前更尖更深邃，疑似再進化。

一向活躍於社交平台嘅何天兒今年初被發現IG停更2個月，直至6月份拍片交代失蹤原因，自爆罹患第七條交叉神經線問題，一度出現面癱情況：「失蹤人口報告， 和大家分享我前陣子的親身面癱經歷，用了3個半月終於完全好起來， 希望大家多留意自己的身體，時刻保持好心情。」何天兒於影片中展示患病時嘅照片，表示當時出現右腦後方持續陣痛、右眼腫脹情況，最嚴重時更加完全失去上唇知覺，最後靠中西合璧治療下逐漸康復逾9成，但仍有後遺症。

而何天兒嘅情史更令人印象深刻，最為轟動嘅係與相差51年已故娛樂大亨林建名發展「爺孫戀」；有指何天兒不勝輿論壓力而劃清界線，令林建名喺傳媒面前灑淚女方唔聽自己電話。後來，何天兒戀上周子揚，與林建名改以「契爺」、「契女」身份相稱，林建名更將何天兒簽入旗下公司，不惜斥億元舉行簽約儀式。不過，何天兒與周子揚嘅戀情及後亦鬧得不歡而散，周子揚曾大爆分手原因係因為何父施壓，又指何天兒家姐何傲芝曾向佢苛索20萬元生活費，惹起一場隔空罵戰，最後何天兒與何傲芝向周子揚發出律師信要求道歉；其後周子揚透過代表律師向何天兒與何傲芝提出和解。