現年25歲梁庭欣（Verna）係模特兒出身，擁有高挑身材，仙氣十足嘅佢笑起嚟仲有啲似湯唯。早前佢喺《2023年國際小姐香港代表競選》脫穎而出，將於10月代表香港出戰喺東京舉行嘅《第61屆國際小姐競選》。喺噚日（9日），大會公佈咗Verna出戰嘅民族服飾，雖然服飾甚有香港本土特色，不過一班網民就唔多buy，留言直指服飾肉酸，甚至有網民指好似天津冬菜同埋痰盂。
噚日大會公佈梁庭欣出戰嘅民族服飾，呢套服裝由香港知專學院（HK Design Institute）演藝造型設計高級文憑課程嘅其中7位學生負責設計及製作，服飾甚有香港本土特色，有當舖招牌、麻雀、夜景及繁體字等元素。不過絕大網民都紛紛留言狠批服飾肉酸：「天津冬菜」、「核突到無人有」、「好在唔係7月節著」、「核突完全唔識欣賞，難為model」、「建議先研究如何將香港元素融合, 而不是硬堆砌….」、「Fashion 嘅野我真係識條鐵」、「咁都算carry到當贏咗㗎喇~」、「so unique」」、「我究竟睇咗啲乜」、「著咗個痰盂上身」、「人靚 衫唔得」、「係咪有冥通銀行贊助 咁似既」及「明顯地將所有嘢炒埋一碟 缺乏主題」等等。