TVB上位小花何依婷（Regina）近期憑劇集《新聞女王》飾演主播徐曉薇一角，喺網絡獲得高討論度，人氣急升。佢事業得意之外，愛情同樣得意，喺早前突然宣布結婚消息，獲得全城祝福。不過佢喺今日（29日）出IG Story鬧爆表示自己被跟蹤。

何依婷喺IG Story寫道：「最近其實真的很忙，每天跑宣傳訪問，約不同的人開會備婚。偏偏今天出門時發現被跟蹤，其實大家有什麼想知道？為什麼不直接問我，要玩跟蹤呢？我可以直接話俾你知，我今日要開二個會。撇除演員的職業一個正常人，有誰喜歡被跟蹤？被曲解？被揭私隱？不被尊重？」原來人氣上升為她帶來困擾，竟然引來不知名人士跟蹤，真係好危險！

佢喺同一 IG Story再寫話：「做個民調先：『觀眾們，你們是不是鍾意睇演員被跟蹤？』」及「#純學術討論 #今日喺度講真話有少少猛烈 #利申上封面唔係我自願架 #被人揭私隱都唔係#費事大家誤會我好鍾意見報」。

何依婷參加2017年港姐入行，安排擔任《學是學非》中「是非精」一員成功入屋，及後於劇集《機場特警》演「絕世港女」令觀眾留意到佢嘅演技。何依婷更加備受力捧，2021年擔正台慶劇《十月初五的月光》，於劇內一人分飾三角，飾演女主角祝君好外，仲演埋演君好媽媽莎莎及其孖生妹妹萬朱莎華（年輕版）。近期，更憑《新聞女王》人氣急升。