踏入7月，係時候做個上半年年結。香港票房有限公司公布香港上半年電影票房數字。由於今年上半年有104日，戲院都因為政府防疫規定而停業，即使重開都有人數限制，上半年本地票房收入只有3億5787萬，對比疫情前2019年上半年嘅10億4586萬大跌6成半。

今年上半年只有6套港產片上映，全部都係戲院重開之後先上畫，4部而家仲係上映中。票房收入頭5位嘅港片，全部唔過100萬。最好數嘅係《逃獄兄弟3》，截至6月底收71萬3千；第2位係上畫一周嘅《一樣的天空》，收68萬2千。其餘3套係《不要忘記我愛你》、《逃獄兄弟2》同《被消失的兇案》。

報告提到疫情對電影界嘅影響，包括中港兩地入境後隔離檢疫規定，令工作進度受影響，因此期望新一屆政府能對電影業界伸出援手。

至於外語片嘅五大高收電影就相當醒神，上畫一個月多啲嘅《壯志凌雲︰獨行俠》8545萬票房，成為上半年外語片王。亞軍係Marvel電影《奇異博士2︰失控多重宇宙》，收6545萬；《侏羅紀世界︰統治霸權》收近4885萬排第3。另外2套係《怪獸與鄧不利多的秘密》（2323萬）及《蝙蝠俠》（1741萬）。

隨住世界各地逐步放寬防疫限制，越來越多大片即將登場，對票房應該有一定刺激。港片方面，今年2套賀歲片《闔家辣》同《飯戲攻心》都會陸續喺下半年上畫，早前上優先場嘅《闔家辣》已經收過百萬票房，即係話《闔》已經係今年最高收入港片。希望影迷下半年都會大力支持心水好電影，加油！