女星Angelababy（楊穎）最近人紅多是非，被鬧爆喺劇集進食場口，竟然借位假吃，被網民狠批唔專業，搞到佢要為自己平反指係導演要求。點知佢依家再被發現，竟然有5套劇同時被除名，作品主演名單上冇咗佢個名，但海報依然樣，包括《塵緣》﹑《漫影尋蹤》﹑《暮色心約》﹑同近日播出嘅《愛情應該有的樣子》，不過佢多年前已拍畢嘅《渴望生活》，名單上仍然有因涉及婚外情而遭封殺嘅吳秀波個名，反而Baby已「被消失」。
網友開始對佢突如其來被除名一事猜測，有網友估佢疑因為爭奪主演排位次序而得罪高層，亦有猜測指係影視平台之爭，搞到佢個名唔可以出現，各有各說法。加上上月有消息指Baby 4間工作室同時注銷，注銷嘅原因係決議解散，網友就有更多聯想空間。