殿堂級組合草蜢前晚於紅館開騷，3子從升降台機關「彈出」登場，又以獨特造型鬥搶鏡！他們即興邀坐在觀眾席的天后容祖兒「隔空」合唱，炒熱全場氣氛。

草蜢相隔5年再踏紅館舞台，前晚為一連4場演唱會揭開序幕，吸引天后容祖兒與母親、蘇永康、關心妍等捧場。草蜢由升降台「彈出」，是MIRROR紅館事故後首次有歌手用這方式出場，台下粉絲即時High爆。蔡一智以「雞冠Look」登場，蔡一傑「低胸」騷肌，蘇志威（阿細）則以銀髮搶鏡，甫開場即跳唱近30分鐘炒熱氣氛。

經過連串快歌「舞」爆紅館，傑仔先跟觀眾打招呼：「5年冇見還好嗎？」阿細笑言大家依然青春：「5年前冇諗過5年後先再開演唱會，希望下次等5個月啦！大家都唔知道聽日會發生咩事，今晚最緊要玩得開心。」當他們獻唱《再見Rainy Days》時，「人夫」阿細輕撫女舞蹈員的臀部，非常火辣。

除衫要加錢

在慢歌環節中，傑仔感性表示所有人戴着口罩，不肯定大家是否開心：「咁耐冇見大家，今次見面要戴住口罩，有疫情分離嘅感覺，希望盡快掃走病毒唔使戴口罩，再冇呢種分離感。」接近尾聲時，阿細突然脫下外套，穿透視白花恤衫的他肌肉若隱若現，打趣問觀眾是否想他脫掉恤衫，傑仔即作勢阻止，笑言：「除衫就唔係呢個價錢喇！」阿細得戚說：「冇諗到呢個年紀仲有6舊腹肌！」

此時傑仔向台下VIP席的祖兒招手，即興邀請對方上台合唱，但隨即說：「上台要先做檢測，咁喺原位唱啦，係咪有人攞咪畀佢？」3子帶動全場大嗌「祖兒」，此時祖兒轉身補唇膏，相當貪靚，之後4人「隔空」合唱《怎麼天生不是女人》，掀起全晚高潮。唱畢後智仔笑言：「祖兒11月飛美國巡唱喇，喺度祝福佢一切順利。」最後草蜢送上一曲《我們》。

此外，早前有指在MIRROR紅館騷綵排時受傷的舞蹈員羅德智（Zisac），在草蜢個唱「復工」 ，但原來他只當觀眾，並在社交網限時動態留言：「手足good show。」