無綫藝人馮盈盈與丁子朗昨日齊齊出席活動搵真銀，快將合演新劇的他們自爆相當有緣。對於被指「執二攤」演女主角，盈盈表現大方，坦言絕不介懷！
馮盈盈與丁子朗（丁丁）昨日出席婚紗展活動，談到下月開拍無綫新劇《妳不是她》，他們表示同於2016年當選香港小姐及香港先生，見證彼此成長，相當有緣，但多年來合作機會不多，盈盈說：「對上一次係2年前嘅《逆天奇案》，幾期待今次合作擦出火花。（套劇未開拍已經好多傳聞！）多謝大家關注，係好事嚟。（有冇親熱戲？）其實我哋連劇本都未有，只係開過會知道初步故事大綱。」
對於被指「執陳自瑤二攤」演女主角，盈盈表示：「徐先生（無綫戲劇製作總監徐正康）已經回應同交代咗，我唔需要講喇，不過我收到演出通知已經一段時間。Propet Sneakers （會唔會影響你嘅心情？）傳聞啫，我冇放喺心。（話你終於解凍。）有咁嘅事咩？其實我一直忙緊工作，只係有啲節目未出街，好似呢套劇咁，未官宣都驚洩密，所以唔敢講太多。（你冇拍劇差唔多兩年，需要熱身先？）好多前輩好專業，唔需要熱身，雖然我冇佢哋咁叻，但相信都唔會有太大影響。」
洪嘉豪合照冧粉絲
丁丁力撐盈盈表示：「我見佢都拍咗好多綜藝節目，一直好忙㗎。（你一早知道邊個做女主角？）真係唔清楚，有時記者啲消息仲快過我。（想同陳自瑤定盈盈合作多啲？）唔好跣我啦！不過今次能夠同盈盈合作極開心呀。」並自爆已開始健身：「監製話最起碼要操背，叫我哋搵定啲着起上嚟舒服嘅運動衫。最緊要如果真係除衫，唔好失禮街坊。」同場的歌手洪嘉豪吸引大批粉絲捧場，演唱時儼如舉行小型音樂會。事後他相當識做，跟粉絲大合照。
