視后胡定欣對主演邵氏新劇的宣傳海報，其身影在內地離奇被「消失」，定欣對這敏感問題表現得小心翼翼，只說：「冇事嘅放心！」而剛續約的高海寧在巡禮似被「冷待」，她深信終有一天會企在第一排最正位置。

無綫為慶賀五十五周年，昨晚假尖東酒店舉行盛大晚宴，廣邀政、商名人出席，當紅小生花旦傾巢而出，包括陳豪、馬國明、胡定欣、蔡思貝、林夏薇、高海寧、朱晨麗、陳煒、張振朗、羅子溢及姚子羚等，星光熠熠。胡定欣被問到其主演的邵氏劇集《廉政狙擊》的內地宣傳海報中被消失一事，她避忌地說：「今日喺呢個Event我唔回應喇！總之劇集之後會處理，我有拍嘅。（驚唔驚戲份被刪？）唔答喇，冇事嘅放心，我仲有2套劇未播，仲有《破毒強人》，我都相當期待，因為兩套嘅角色都好鍾意。」

高海寧：終有一日企頭排

而剛續約無綫的高海寧，日前在節目巡禮大合照時，被安排企在第二排，問到不是頭排有否不開心？她指自己是企第二排中間位：「唔睇重呢樣嘢，最緊要簽番公司後覺得係最好嘅選擇，我終有一日會企第一排。」

另外，原定12月推出的新劇《新四十二章》，盛傳改由《輕．功》或《法言人》取代做台慶劇，《法》劇主角林夏薇說：「真係唔知喎，公司好多節目成日有調動，正常嘅。」如果該劇順利推出，她大有機會冧莊視后，她說：「我唔係為咗爭獎先拍劇，我真係鍾意演戲，好享受個過程。」準備拍廣告的她忙於操肌，並說：「要有靚嘅線條係好難，唔可以偷懶。」同劇的馬國明也未有聽聞劇集推出，談到明年與湯洛雯結婚一事，他說：「我想同大家解釋番，話結婚嗰件事唔係『宣布婚訊』，只係同阿湯有呢個共識，各樣都未落實。」

無綫總經理曾志偉透露無綫開台以來為慈善機構共籌得65億港元，故請來不少嘉賓出席見證。談到《開心無敵獎門人》收視不敵林敏驄的《下流上車族》，他認輸笑說：「我哋呢啲上流人最怕下流人，林敏驄成世人都唔識喊，依家搞到人日日喊，結局真係好感人，我都眼濕濕，因為要畀咁多錢佢，真係欠佢哋一餐同裸跑，我訂定響螺請佢哋食飯。」