「細龍太」陳思圻早前自爆拍攝《愛．回家之開心速遞》期間，被前輩以粗口喪鬧，嫌疑人「長腳蟹」呂慧儀昨日出席活動時自認劇中有鬧人，劇外則冇印象，她認為情緒人人有，但盡量不帶入工作之中。
無綫處境劇《愛．回家之開心速遞》一眾演員呂慧儀、蘇韻姿、林淑敏及許家傑等昨日出席宣傳活動，提到陳思圻大爆曾被《愛》劇前輩以粗口責罵，有傳此人正是呂慧儀，她聞言表示不知情：「又係我？我哋好和諧，我唔知佢講邊個，點解佢唔開名？（你有冇鬧過人？）劇中有，劇外冇呢個印象，我通常係道出事實。（有冇試過發脾氣？）每個演員都有情緒，但將情緒帶入套劇就會影響表現，所以我盡量唔會。（有冇畀人鬧過？）我係聲大大，令人哋以為我鬧人，我都冇畀人鬧過。」
撐港姐泳裝展美態
另外，呂慧儀透露會做港姐決賽的星級觀眾，問會否性感上陣？她笑說：「我怕嚇親人，而且囝囝會睇，我啲衫要經過佢同意，唔可以好性感。」對於監警會委員批評港姐泳裝少布，港姐出身的她並不認同：「點解港姐做咗咁多年，依家先咁講？泳衣環節係展示體態美，如果唔着泳裝，咁應該着咩？」蘇韻姿亦指全球選美活動都有泳裝環節。
至於林淑敏早前在《愛》劇重現電影《賭神》中「菊子」搖骰的經典一幕，被網民激讚，她自爆稍後會扮演《我和殭屍有個約會》的馬小玲，但自嘲：「我係『老小玲』。（騷長腿？）我條腿唔夠長，惟有條裙短啲，營造錯誤視覺效果。」而許家傑則想扮《六舊腹肌拯救隊》騷腹肌。
