New Jordan Hey Dude Women's Shoes Cadysneaker Dr Martens Boots New Air Force 1
2021Shoes

香港影業協會上周五發布2021年上半年度香港電影票房整體情況,由今年1月1日至6月30日共上映130部電影,其中24部為香港電影,106部為外地電影。雖然比起2020年因為疫情戲院一共停業116日嘅情況稍好,票房收入共$375,988,654,較2020年$293,170,268票房理想,不過成績比起疫情前仍有一段距離。

今年無咗賀歲黃金檔,重創港產片收入。舊年停業多時,但受惠於節日氣氛及過年睇戲傳統,賀歲片《乜代宗師》及《家有囍事》分別收2900萬及1200萬票房,反觀今年上半年最高收入港產片為僅收1900萬嘅《拆彈專家2》,第2位係口碑甚佳仍在上映中嘅《一秒拳王》,暫時錄得1600萬票房。

第3位係《狂舞派3》,上集《狂》嘅宣傳語句「為咗夢想,你可以去到幾盡?」引起效應,可惜今集票房未能再創新高,埋單僅收870萬。第4位係鉅製兼大cast嘅《真.三國無雙》,票房錄得600百萬,宣傳費都未必夠打和,不過電影喺多國Netflix有得睇,應該幫補到製作費。

愛情片《不日成婚》及《感動她77次》分別以580萬及430萬成為港產電影上半年第5及8位。近期上映由新導演執導嘅《濁水漂流》、《手捲煙》暫時以570萬及470萬佔據名單第6、7位,票房有望於口碑帶動下增長。

西片方面由於欠缺荷里活大片,整體表現麻麻,最高票房由《哥斯拉大戰金剛》以3,500萬穩佔,第2位為《F9狂野時速》,暫時錄得3400萬票房;第3位為迪士尼彼思出品,錄得3000萬票房嘅《靈魂奇遇記》。

港產片下半年有《殺出個黃昏》、《媽媽的神奇小子》,不過真正吸金港產片,可能要等下年賀歲檔。暫時已知有黃子華、鄧麗欣主演嘅《飯戲攻心》及吳君如、人氣王MIRROR成員Edan(呂爵安)主演嘅《闔家辣》會上映。

隨住下半年有漫威《黑寡婦》、《尚氣與十環幫傳奇》、《永恆族》、《毒魔2》及《007:生死有時》等吸金大片陸續上場,相信有助戲院業界回一回氣!

發佈回覆

你的電郵地址並不會被公開。 必要欄位標記為 *